Synthesibus dum gaudet eques dominusque senator

dumque decent nostrum pillea sumpta Iouem;

nec timet aedilem moto spectare fritillo,

cum uideat gelidos tam prope uerna lacus:

diuitis alternas et pauperis accipe sortes:

praemia conuiuae dent sua quisque suo.

"Sunt apinae tricaeque et si quid uilius istis".

Quis nescit? Vel quis tam manifesta negat?

Sed quid agam potius madidis, Saturne, diebus,

quos tibi pro caelo filius ipse dedit?

Vis scribam Thebas Troiamue malasue Mycenas?

"Lude", inquis, "nucibus": perdere nolo nuces.

Quo uis cumque loco potes hunc finire libellum:

uersibus explicitumst omne duobus opus.

Lemmata si quaeris cur sint adscripta, docebo:

ut, si malueris, lemmata sola legas.

Secta nisi in tenues essemus ligna tabellas,

essemus Libyci nobile dentis onus.

Caede iuuencorum domini calet area felix,

quinquiplici cera cum datur altus honos.

Languida ne tristes obscurent lumina cerae,

nigra tibi niueum littera pingat ebur.

Tunc triplices nostros non uilia dona putabis,

cum se uenturam scribet amica tibi.

Esse puta ceras, licet haec membrana uocetur:

delebis, quotiens scripta nouare uoles.

Nondum legerit hos licet puella,

nouit quid cupiant Vitelliani.

Quod minimos cernis, mitti nos credis amicae.

Falleris: et nummos ista tabella rogat.

Non est munera quod putes pusilla,

cum donat uacuas poëta chartas.

Seu leuiter noto, seu caro missa sodali

omnes ista solet charta uocare suos.

Hos nisi de flaua loculos implere moneta

non decet: argentum uilia ligna ferant.

Si quid adhuc superest in nostri faece locelli,

munus erit. Nihil est; ipse locellus erit.

Cum steterit nullus uultu tibi talus eodem,

munera me dices magna dedisse tibi.

Non sim talorum numero par tessera, dum sit

maior quam talis alea saepe mihi.

Quae scit compositos manus inproba mittere talos,

si per me misit, nil nisi uota feret.

Hac mihi bis seno numeratur tessera puncto;

calculus hac gemino discolor hoste perit.

Insidiosorum si ludis bella latronum,

gemmeus iste tibi miles et hostis erit.

Alea parua nuces et non damnosa uidetur;

saepe tamen pueris abstulit illa natis.

Sortitus thecam calamis armare memento:

cetera nos dedimus, tu leuiora para.

Haec tibi erunt armata suo graphiaria ferro:

si puero dones, non leue munus erit.

Lentiscum melius: sed si tibi frondea cuspis

defuerit, dentes pinna leuare potest.

Si tibi morosa prurigine uerminat auris,

arma damus tantis apta libidinibus.

Splendida ne madidis uiolent bombycina crines,

figat acus tortas sustineatque comas.

Quid faciet nullos hic inuentura capillos

multifido buxus quae tibi dente datur?

Chattica Teutonicos accendit spuma capillos:

captiuis poteris cultior esse comis.

Si mutare paras longaeuos cana capillos,

accipe Mattiacas - quo tibi calua? - pilas.

Accipe quae nimios uincant umbracula soles:

sit licet et uentus, te tua uela tegent.

In Pompeiano tecum spectabo theatro.

Mandatus populo uela negare solet.

Excipient apros exspectabuntque leones,

intrabunt ursos, sit modo firma manus.

Si deiecta gemas longo uenabula rostro,

hic breuis ingentem comminus ibit aprum.

Militiae decus hoc gratique erit omen honoris,

arma tribunicium cingere digna latus.

Pugio, quem curua signat breuis orbita uena.

Stridentem gelidis hunc Salo tinxit aquis.

Pax me certa ducis placidos curuauit in usus.

Agricolae nunc sum, militis ante fui.

Cum fieret tristis soluendis auctio nummis,

haec quadringentis milibus empta fuit.

Tondendis haec arma tibi sunt apta capillis;

unguibus hic longis utilis, illa genis.

Selectos nisi das mihi libellos,

admittam tineas trucesque blattas.

Dat chartis habiles calamos Memphitica tellus;

texantur reliqua tecta palude tibi.

Dulcis conscia lectuli lucerna,

quidquid uis facias licet, tacebo.

Ancillam tibi sors dedit lucernae,

totas quae uigil exigit tenebras.

Inlustrem cum tota meis conuiuia flammis

totque geram myxos, una lucerna uocor.

Hic tibi nocturnos praestabit cereus ignis:

subducta est puero namque lucerna tuo.

Nomina candelae nobis antiqua dederunt.

Non norat parcos uncta lucerna patres.

Esse uides lignum; seruas nisi lumina, fiet

de candelabro magna lucerna tibi.

Haec quae difficili turget paganica pluma,

folle minus laxast et minus arta pila.

Si me mobilibus scis expulsare sinistris,

sum tua. Tu nescis? Rustice, redde pilam.

Ite procul, iuuenes: mitis mihi conuenit aetas:

folle decet pueros ludere, folle senes.

Haec rapit Antaei uelox in puluere draucus,

grandia qui uano colla labore facit.

Quid pereunt stulto fortes haltere lacerti?

Exercet melius uinea fossa uiros.

Ne lutet inmundum nitidos ceroma capillos,

hac poteris madidas condere pelle comas.

Pergamon has misit. Curuo destringere ferro:

non tam saepe teret lintea fullo tibi.

Gestauit modo fronte me iuuencus:

uerum rhinocerota me putabas.

Nuper in Ausonia domini spectatus harena

hic erit ille tibi cui pila taurus erat.

Si quis plorator collo tibi uernula pendet,

haec quatiat tenera garrula sistra manu.

Proficies nihil hoc, caedas licet usque, flagello,

si tibi purpureo de grege currit equus.

Quid mecum est tibi? Me puella sumat:

emptos non soleo polire dentes.

Quod nec Vergilius nec carmine dicit Homerus,

hoc ex unguento constat et ex balano.

Rusticus es? Nescis quid Graeco nomine dicar:

spuma uocor nitri. Graecus es? Aphronitrum.

Balsama me capiunt, haec sunt unguenta uirorum:

delicias Cosmi uos redolete, nurus.

Gratum munus erit scisso nec inutile uentri,

si clara Stephani balnea luce petes.

Dux lanterna uiae clusis feror aurea flammis,

et tuta est gremio parua lucerna meo.

Cornea si non sum, numquid sum fuscior? Aut me

uesicam, contra qui uenit, esse putat?

Ebria nos madidis rumpit tibicina buccis:

saepe duas pariter, saepe monaulon habet.

Quid me conpactam ceris et harundine rides?

Quae primum structa est fistula talis erat.

Defuerit si forte puer soleasque libebit

sumere, pro puero pes erit ipse sibi.

Taurino poteras pectus constringere tergo:

nam pellis mammas non capit ista tuas.

Lambere quae turpes prohibet tua prandia muscas,

alitis eximiae cauda superba fuit.

Sordida si flauo fuerit tibi puluere uestis,

colligat hunc tenui uerbere cauda leuis.

Peccantis famuli pugno ne percute dentes:

clara Rhodos coptam quam tibi misit edat.

Si uis esse satur, nostrum potes esse Priapum;

ipsa licet rodas inguina, purus eris.

Iste tibi faciet bona Saturnalia porcus,

inter spumantes ilice pastus apros.

Qui uenit botulus mediae tibi tempore brumae,

Saturni septem uenerat ante dies.

Psittacus a uobis aliorum nomina discam:

hoc didici per me dicere CAESAR HAVE.

Corue salutator, quare fellator haberis?

In caput intrauit mentula nulla tuum.

Flet Philomela nefas incesti Tereos, et quae

muta puella fuit, garrula fertur auis.

Pica loquax certa dominum te uoce saluto:

si me non uideas, esse negabis auem.

Si tibi talis erit, qualem, dilecta Catullo

Lesbia, plorabas, hic habitare potest.

Artis ebur medicae narthecia cernis: habebis

munera quae cuperet Paccius esse sua.

Ludite lasciui, sed tantum ludite, serui:

haec signata mihi quinque diebus erunt.

Inuisae nimium pueris grataeque magistris,

clara Prometheo munere ligna sumus.

Ne mendica ferat barbati prandia nudi

dormiat et tristi cum cane, pera rogat.

In pretio scopas testatur palma fuisse.

Otia sed scopis nunc analecta dedit.

Defendet manus haec scapulas mordente molesto

pulice, uel si quid pulice sordidius.

Ne toga barbatos faciat uel paenula libros,

haec abies chartis tempora longa dabit.

Nomina dat spondae pictis pulcherrima pinnis

nunc Iunonis auis, sed prius Argus erat.

Stragula succincti uenator sume ueredi:

nam solet a nudo surgere ficus equo.

Accipe lunata scriptum testudine sigma.

Octo capit; ueniat quisquis amicus erit.

Femineam nobis cherson si credis inesse,

deciperis: pelagi mascula praeda sumus.

Accipe felices, Atlantica munera, siluas:

aurea qui dederit dona, minora dabit.

Non sum crispa quidem nec siluae filia Maurae,

sed norunt lautas et mea ligna dapes.

Grandia taurorum portant qui corpora, quaeris

an Libycas possint sustinuisse trabes?

Puncta notis ilex et acuta cuspide clusa

saepe redemptoris prodere furta solet.

Non est ista recens, nec nostri gloria caeli:

primus in his Mentor, dum facit illa, bibit.

Nos sumus audacis plebeia toreumata uitri,

nostra neque ardenti gemma feritur aqua.

Quamuis Callaico rubeam generosa metallo,

glorior arte magis: nam Myos iste labor.

Vilia sutoris calicem monimenta Vatini

accipe; sed nasus longior ille fuit.

Grandia ne uiola paruo chrysendeta mullo:

ut minimum, libras debet habere duas.

Arretina nimis ne spernas uasa monemus:

lautus erat Tuscis Porsena fictilibus.

Barbara de pictis ueni bascauda Britannis,

sed me iam mauolt dicere Roma suam.

Si non ignota est docti tibi terra Catulli,

potasti testa Raetica uina mea.

Cum mihi boleti dederint tam nobile nomen,

prototomis - pudet heu! - seruio coliculis.

Accipe non uili calices de puluere natos,

sed Surrentinae leue toreuma rotae.

Setinos, moneo, nostra niue frange trientes:

pauperiore mero tingere lina potes.

Attenuare niues norunt et lintea nostra:

frigidior colo non salit unda tuo.

Frigida non derit, non derit calda petenti.

Sed tu morosa ludere parce siti.

Hic tibi donatur panda ruber urceus ansa.

Stoicus hoc gelidam Fronto petebat aquam.

Nos Satyri, nos Bacchus amat, nos ebria tigris,

perfusos domini lambere docta pedes.

Quae non sollicitus teneat seruetque minister

sume Saguntino pocula facta luto.

Gemmatum Scythicis ut luceat ignibus aurum

aspice. Quot digitos exuit iste calix!

Hac licet in gemma, seruat quae nomina Cosmi,

luxuriose, bibas, si foliata sitis.

Frangere dum metuis, franges crystallina: peccant

securae nimium sollicitaeque manus.

A Ioue qui ueniet, miscenda ad pocula largas

fundet nimbus aquas: hic tibi uina dabit.

Si caldum potas, ardenti murra Falerno

conuenit et melior fit sapor inde mero.

Hanc tibi Cumano rubicundam puluere testam

municipem misit casta Sibylla suam.

Aspicis ingenium Nili: quibus addere plura

dum cupit, ah quotiens perdidit auctor opus!

Spoletina bibis uel Marsis condita cellis:

quo tibi decoctae nobile frigus aquae?

Non potare niuem sed aquam potare recentem

de niue commenta est ingeniosa sitis.

Massiliae fumos miscere niualibus undis

parce, puer, constet ne tibi pluris aqua.

Dum poscor crepitu digitorum et uerna moratur,

o quotiens paelex culcita facta mea est!

Quamuis me ligulam dicant equitesque patresque,

dicor ab indoctis lingula grammaticis.

Sum cocleis habilis sed nec minus utilis ouis,

numquid scis, potius cur cocleare uocor?

Ante frequens sed nunc rarus nos donat amicus.

Felix cui comes est non alienus eques.

Saepe grauis digitis elabitur anulus unctis,

tuta mea fiet sed tua gemma fide.

Romanos rerum dominos gentemque togatam

ille facit, magno qui dedit astra patri.

Si matutinos facilest tibi perdere somnos

attrita ueniet sportula saepe toga.

Pauperis est munus sed non est pauperis usus:

hanc tibi pro laena mittimus endromida.

Haec tibi turbato Canusina simillima mulso

munus erit. Gaude: non cito fiet anus.

Gallia Santonico uestit te bardocucullo.

Cercopithecorum paenula nuper erat.

Roma magis fuscis uestitur, Gallia rufis,

et placet hic pueris militibusque colos.

Ingrediare uiam caelo licet usque sereno,

ad subitas nusquam scortea desit aquas.

Si ueneto prasinoue faues, quid coccina sumes?

Ne fias ista transfuga sorte uide.

Si possem, totas cuperem misisse lacernas:

nunc tantum capiti munera mitto tuo.

Non est lana mihi mendax nec mutor aheno.

Sic placeant Tyriae: me mea tinxit ouis.

Fascia crescentes dominae compesce papillas,

ut sit quod capiat nostra tegatque manus.

Amphitheatrali nos commendamus ab usu,

cum teget algentes alba lacerna togas.

Nec fora sunt nobis nec sunt uadimonia nota:

hoc opus est, pictis accubuisse toris.

Si recitaturus dedero tibi forte libellum,

hoc focale tuas adserat auriculas.

Tempore brumali non multum leuia prosunt:

calfaciunt uilli pallia uestra mei.

Nobilius uillosa tegant tibi lintea citrum:

orbibus in nostris circulus esse potest.

Iungere nescisti nobis, o stulte, lacernas:

indueras albas, exue callainas.

Non hos lana dedit sed olentis barba mariti:

Cinyphio poterit planta latere sinu.

Dum toga per quinas gaudet requiescere luces,

hos poteris cultus sumere iure tuo.

Vellera consumunt Patauinae multa trilices,

et pingues tunicas serra secare potest.

Haec tibi sorte datur tergendis spongea mensis

utilis, expresso cum leuis imbre tumet.

Is mihi candor inest, uillorum gratia tanta,

ut me uel media sumere messe uelis.

Tingue caput Cosmi folio, ceruical olebit:

perdidit unguentum cum coma, pluma tenet.

Stragula purpureis lucent uillosa tapetis.

Quid prodest si te congelat uxor anus?

Nudo stragula ne toro paterent,

iunctae nos tibi uenimus sorores.

Mammosas metuo; tenerae me trade puellae,

ut possint niueo pectore lina frui.

Haec tibi Menphitis tellus dat munera: uicta est

pectine Niliaco iam Babylonos acus.

Longa satis nunc sum; dulci sed pondere uenter

si tumeat, fiam tunc tibi zona breuis.

Lodices mittet docti tibi terra Catulli;

nos Helicaonia de regione sumus.

Det tunicam locuples: ego te praecingere possum.

Essem si locuples, munus utrumque darem.

Ebria Sidoniae cum sim de sanguine conchae,

non uideo quare sobria lana uocer.

Velleribus primis Apulia, Parma secundis

nobilis: Altinum tertia laudat ouis.

Nos Lacedaemoniae pastor donauit amicae:

deterior Ledae purpura matris erat.

Non tantum pullo lugentes uellere lanas,

sed solet et calices haec dare terra suos.

Lana quidem tristis sed tonsis neta ministris,

quales non primo de grege mensa citat.

Oppressae nimium uicina est fascia plumae?

Vellera Leuconicis accipe rasa sagis.

Tomentum concisa palus Circense uocatur.

Haec pro Leuconico stramina pauper emit.

Lassus Amyclaea poteris requiescere pluma,

interior cycni quam tibi lana dedit.

Fraudata tumeat fragilis tibi culcita mula.

Non uenit ad duros pallida cura toros.

Redde pilam: sonat aes thermarum. Ludere pergis?

Virgine uis sola lotus abire domum.

Splendida cum uolitant Spartani pondera disci,

este procul, pueri: sit semel ille nocens.

Reddidit Eurydicen uati: sed perdidit ipse,

dum sibi non credit nec patienter amat.

De Pompeiano saepe est eiecta theatro

quae duxit siluas detinuitque feras.

Feruida ne trito tibi pollice pusula surgat,

exornent docilem candida plectra lyram.

Inducenda rota est: das nobis utile munus:

iste trochus pueris at mihi canthus erit.

Garrulus in laxo cur anulus orbe uagatur?

Cedat ut argutis obuia turba trochis.

Haec illi sine sorte datur cui nomina Rhenus

uera dedit. Deciens adde Falerna, puer.

Gloria tam parui non est obscura sigilli:

istius pueri Brutus amator erat.

Ad te reptandi, puer insidiose, lacertae

parce; cupit digitis illa perire tuis.

Flectit ab inuiso morientia lumina disco

Oebalius, Phoebi culpa dolorque, puer.

Masculus intrauit fontis: emersit utrumque:

pars est una patris, cetera matris habet.

Cur a te pretium Danaë, regnator Olympi,

accepit, gratis si tibi Leda dedit?

Sum figuli lusus russi persona Bataui.

Quae tu derides, haec timet ora puer.

Elidit geminos infans nec respicit anguis.

Iam poterat teneras hydra timere manus.

Sum fragilis: sed tu, moneo, ne sperne sigillum:

non pudet Alciden nomen habere meum.

Dic mihi, uirgo ferox, cum sit tibi cassis et hasta,

quare non habeas aegida. "Caesar habet".

Mutari melius tauro, pater optime diuum,

tunc poteras Io cum tibi uacca fuit.

Clamabat tumidis audax Leandros in undis:

"Mergite me fluctus cum rediturus ero".

Ebrius haec fecit terris, puto, monstra Prometheus:

Saturnalicio lusit et ipse luto.

Perlege Maeonio cantatas carmine ranas

et frontem nugis soluere disce meis.

Ilias et Priami regnis inimicus Vlixes

multiplici pariter condita pelle latent.

Accipe facundi Culicem, studiose, Maronis,

ne nucibus positis "Arma virumque" legas.

Quam breuis inmensum cepit membrana Maronem

ipsius uultus prima tabella gerit.

Hac primum iuuenum lasciuos lusit amores;

nec Glycera pueri, Thais amica fuit.

Si comes ista tibi fuerit membrana, putato

carpere te longas cum Cicerone uias.

Cynthia - facundi carmen iuuenale Properti -

accepit famam, non minus ipsa dedit.

Pellibus exiguis artatur Liuius ingens,

quem mea non totum bibliotheca capit.

Hic erit, ut perhibent doctorum corda uirorum,

primus Romana Crispus in historia.

Haec tibi multiplici quae structa est massa tabella,

carmina Nasonis quinque decemque gerit.

Vssit amatorem Nemesis lasciua Tibullum,

in tota iuuit quem nihil esse domo.

Sunt quidam qui me dicant non esse poëtam:

sed qui me uendit bybliopola putat.

Tantum magna suo debet Verona Catullo,

quantum parua suo Mantua Vergilio.

Haec tibi quae fontes et aquarum nomina dicit,

ipsa suas melius charta natabat aquas.

His tibi de mulis non est metuenda ruina:

altius in terra saepe sedere soles.

Delicias paruae si uis audire catellae,

narranti breuis est pagina tota mihi.

Hic breuis ad numeros rapidum qui colligit unguem,

uenit ab auriferis gentibus Astur equus.

Non sibi sed domino uenatur uertragus acer,

inlaesum leporem qui tibi dente feret.

Non amo quod uincat, sed quod succumbere nouit

et didicit melius τὴν ἐπικλινοπάλην.

Callidus emissas eludere simius hastas,

si mihi cauda foret, cercopithecus eram.

Tam tremulum crisat, tam blandum prurit, ut ipsum

masturbatorem fecerit Hippolytum.

Aera Celaenaeos lugentia matris amores

esuriens Gallus uendere saepe solet.

Sit nobis aetate puer, non pumice leuis,

propter quem placeat nulla puella mihi.

Collo necte, puer, meros amores,

ceston de Veneris sinu calentem.

Sume Cytheriaco medicatum nectare ceston:

ussit amatorem balteus iste Iouem.

Currant uerba licet, manus est uelocior illis:

nondum lingua suum, dextra peregit opus.

Leuis ab aequorea cortex Mareotica concha

fiat: inoffensa curret harundo uia.

Non mendax stupor est nec fingitur arte dolosa.

Quisquis plus iusto non sapit, ille sapit.

Mollia Phrixei secuisti colla mariti.

Hoc meruit tunicam qui tibi, saeue, dedit?

Si solum spectes hominis caput, Hectora credas:

si stantem uideas, Astyanacta putes.

Haec, quae saepe solet uinci, quae uincere raro,

parma tibi, scutum pumilionis erit.

Non erit in turba quisquam Μισούμενος ista:

sed poterit quiuis esse Δὶς ἐξαπατῶν.

Dic mihi simpliciter, comoedis et citharoedis,

fibula, quid praestas? "Carius ut futuant".

Non tantum calamis sed cantu fallitur ales,

callida dum tacita crescit harundo manu.

Praedo fuit uolucrum: famulus nunc aucupis idem

decipit et captas non sibi maeret aues.

Dic quotus et quanti cupias cenare nec unum

addideris uerbum: cena parata tibi est.

Pauper causidicus nullos referentia nummos

carmina cum scribas, accipe cor, quod habes.

Non satis est ars sola coco: seruire palatum

nolo: cocus domini debet habere gulam.

Rara tibi curua craticula sudet ofella;

spumeus in longa cuspide fumet aper.

Mille tibi dulces operum manus ista figuras

exstruet: huic uni parca laborat apis.

Surgite: iam uendit pueris ientacula pistor

cristataeque sonant undique lucis aues.

Sŷnthĕsĭbūs dūm gaūdĕt ĕquēs dŏmĭnūsquĕ sĕnātōr

dūmquĕ dĕcēnt nōstrūm ‖ pīllĕă sūmptă Iŏvēm;

nēc tĭmĕt aēdīlēm mōtō spēctārĕ frĭtīllō,

cūm vĭdĕāt gĕlĭdōs ‖ tām prŏpĕ vērnă lăcūs:

dīvĭtĭs āltērnās ēt paūpĕrĭs āccĭpĕ sōrtēs:

praēmĭă cōnvīvaē ‖ dēnt sŭă quīsquĕ sŭō.

"Sūnt ăpĭnaē trīcaēque ēt sī quīd vīlĭŭs īstīs".

Quīs nēscīt? Vēl quīs ‖ tām mănĭfēstă nĕgāt?

Sēd quĭd ăgām pŏtĭūs mădĭdīs, Sātūrnĕ, dĭēbūs,

quōs tĭbĭ prō caēlō ‖ fīlĭŭs īpsĕ dĕdīt?

Vīs scrībām Thēbās Troīāmvĕ mălāsvĕ Mўcēnās?

"Lūde", īnquīs, "nŭcĭbūs": ‖ pērdĕrĕ nōlŏ nŭcēs.

Quō vīs cūmquĕ lŏcō pŏtĕs hūnc fīnīrĕ lĭbēllūm:

vērsĭbŭs ēxplĭcĭtūmst ‖ ōmnĕ dŭōbŭs ŏpūs.

Lēmmătă sī quaērīs cūr sīnt ādscrīptă, dŏcēbō:

ūt, sī mālŭĕrīs, ‖ lēmmătă sōlă lĕgās.

Sēctă nĭsi īn tĕnŭēs ēssēmūs līgnă tăbēllās,

ēssēmūs Lĭbўcī ‖ nōbĭlĕ dēntĭs ŏnūs.

Caēdĕ iŭvēncōrūm dŏmĭnī călĕt ārĕă fēlīx,

quīnquĭplĭcī cērā ‖ cūm dătŭr āltŭs hŏnōs.

Lānguĭdă nē trīstēs ōbscūrēnt lūmĭnă cēraē,

nīgră tĭbī nĭvĕūm ‖ līttĕră pīngăt ĕbūr.

Tūnc trĭplĭcēs nōstrōs nōn vīlĭă dōnă pŭtābīs,

cūm sē vēntūrām ‖ scrībĕt ămīcă tĭbī.

Ēssĕ pŭtā cērās, lĭcĕt haēc mēmbrānă vŏcētūr:

dēlēbīs, quŏtĭēns ‖ scrīptă nŏvārĕ vŏlēs.

Nōndūm lēgĕrĭt hōs lĭcēt pŭēllă,

nōvīt quīd cŭpĭānt Vĭtēllĭānī.

Quōd mĭnĭmōs cērnīs, mīttī nōs crēdĭs ămīcaē.

Fāllĕrĭs: ēt nūmmōs ‖ īstă tăbēllă rŏgāt.

Nōn ēst mūnĕră quōd pŭtēs pŭsīllă,

cūm dōnāt văcŭās pŏētă chārtās.

Seū lĕvĭtēr nōtō, seū cārō mīssă sŏdālī

ōmnēs īstă sŏlēt ‖ chārtă vŏcārĕ sŭōs.

Hōs nĭsĭ dē flāvā lŏcŭlōs īmplērĕ mŏnētā

nōn dĕcĕt: ārgēntūm ‖ vīlĭă līgnă fĕrānt.

Sī quĭd ădhūc sŭpĕrēst īn nōstrī faēcĕ lŏcēllī,

mūnŭs ĕrīt. Nĭhĭl ēst; ‖ īpsĕ lŏcēllŭs ĕrīt.

Cūm stĕtĕrīt nūllūs vūltū tĭbĭ tālŭs ĕōdēm,

mūnĕră mē dīcēs ‖ māgnă dĕdīssĕ tĭbī.

Nōn sīm tālōrūm nŭmĕrō pār tēssĕră, dūm sīt

māiōr quām tālīs ‖ ālĕă saēpĕ mĭhī.

Quaē scīt cōmpŏsĭtōs mănŭs īnprŏbă mīttĕrĕ tālōs,

sī pēr mē mīsīt, ‖ nīl nĭsĭ vōtă fĕrēt.

Hāc mĭhĭ bīs sēnō nŭmĕrātūr tēssĕră pūnctō;

cālcŭlŭs hāc gĕmĭnō ‖ dīscŏlŏr hōstĕ pĕrīt.

Īnsĭdĭōsōrūm sī lūdīs bēllă lătrōnūm,

gēmmĕŭs īstĕ tĭbī ‖ mīlĕs ĕt hōstĭs ĕrīt.

Ālĕă pārvă nŭcēs ēt nōn dāmnōsă vĭdētūr;

saēpĕ tămēn pŭĕrīs ‖ ābstŭlĭt īllă nătīs.

Sōrtītūs thēcām călămīs ārmārĕ mĕmēntō:

cētĕră nōs dĕdĭmūs, ‖ tū lĕvĭōră părā.

Haēc tĭbi ĕrūnt ārmātă sŭō grăphĭārĭă fērrō:

sī pŭĕrō dōnēs, ‖ nōn lĕvĕ mūnŭs ĕrīt.

Lēntīscūm mĕlĭūs: sēd sī tĭbĭ frōndĕă cūspīs

dēfŭĕrīt, dēntēs ‖ pīnnă lĕvārĕ pŏtēst.

Sī tĭbĭ mōrōsā prūrīgĭnĕ vērmĭnăt aūrīs,

ārmă dămūs tāntīs ‖ āptă lĭbīdĭnĭbūs.

Splēndĭdă nē mădĭdīs vĭŏlēnt bōmbŷcĭnă crīnēs,

fīgăt ăcūs tōrtās ‖ sūstĭnĕātquĕ cŏmās.

Quīd făcĭēt nūllōs hīc īnvēntūră căpīllōs

mūltĭfĭdō būxūs ‖ quaē tĭbĭ dēntĕ dătūr?

Chāttĭcă Teūtŏnĭcōs āccēndīt spūmă căpīllōs:

cāptīvīs pŏtĕrīs ‖ cūltĭŏr ēssĕ cŏmīs.

Sī mūtārĕ părās lōngaēvōs cānă căpīllōs,

āccĭpĕ Māttĭăcās ‖ - quō tĭbĭ cālvă? - pĭlās.

Āccĭpĕ quaē nĭmĭōs vīncānt ūmbrācŭlă sōlēs:

sīt lĭcĕt ēt vēntūs, ‖ tē tŭă vēlă tĕgēnt.

Īn Pōmpēiānō tēcūm spēctābŏ thĕātrō.

Māndātūs pŏpŭlō ‖ vēlă nĕgārĕ sŏlēt.

Ēxcĭpĭēnt āprōs ēxspēctābūntquĕ lĕōnēs,

īntrābūnt ūrsōs, ‖ sīt mŏdŏ fīrmă mănūs.

Sī dēiēctă gĕmās lōngō vēnābŭlă rōstrō,

hīc brĕvĭs īngēntēm ‖ cōmmĭnŭs ībĭt ăprūm.

Mīlĭtĭaē dĕcŭs hōc grātīque ĕrĭt ōmĕn hŏnōrīs,

ārmă trĭbūnĭcĭūm ‖ cīngĕrĕ dīgnă lătūs.

Pūgĭŏ, quēm cūrvā sīgnāt brĕvĭs ōrbĭtă vēnā.

Strīdēntēm gĕlĭdīs ‖ hūnc Sălŏ tīnxĭt ăquīs.

Pāx mē cērtă dŭcīs plăcĭdōs cūrvāvĭt ĭn ūsūs.

Āgrĭcŏlaē nūnc sūm, ‖ mīlĭtĭs āntĕ fŭī.

Cūm fĭĕrēt trīstīs sōlvēndīs aūctĭŏ nūmmīs,

haēc quādrīngēntīs ‖ mīlĭbŭs ēmptă fŭīt.

Tōndēndīs haēc ārmă tĭbī sūnt āptă căpīllīs;

ūnguĭbŭs hīc lōngīs ‖ ūtĭlĭs, īllă gĕnīs.

Sēlēctōs nĭsĭ dās mĭhī lĭbēllōs,

ādmīttām tĭnĕās trŭcēsquĕ blāttās.

Dāt chārtīs hăbĭlēs călămōs Mēmphītĭcă tēllūs;

tēxāntūr rĕlĭquā ‖ tēctă pălūdĕ tĭbī.

Dūlcīs cōnscĭă lēctŭlī lŭcērnă,

quīdquīd vīs făcĭās lĭcēt, tăcēbō.

Āncīllām tĭbĭ sōrs dĕdīt lŭcērnaē,

tōtās quaē vĭgĭl ēxĭgīt tĕnēbrās.

Īnlūstrēm cūm tōtă mĕīs cōnvīvĭă flāmmīs

tōtquĕ gĕrām mŷxōs, ‖ ūnă lŭcērnă vŏcōr.

Hīc tĭbĭ nōctūrnōs praēstābīt cērĕŭs īgnīs:

sūbdūcta ēst pŭĕrō ‖ nāmquĕ lŭcērnă tŭō.

Nōmĭnă cāndēlaē nōbīs āntīquă dĕdērūnt.

Nōn nōrāt pārcōs ‖ ūnctă lŭcērnă pătrēs.

Ēssĕ vĭdēs līgnūm; sērvās nĭsĭ lūmĭnă, fīēt

dē cāndēlābrō ‖ māgnă lŭcērnă tĭbī.

Haēc quaē dīffĭcĭlī tūrgēt pāgānĭcă plūmā,

fōllĕ mĭnūs lāxāst ‖ ēt mĭnŭs ārtă pĭlā.

Sī mē mōbĭlĭbūs scīs ēxpūlsārĕ sĭnīstrīs,

sūm tŭă. Tū nēscīs? ‖ Rūstĭcĕ, rēddĕ pĭlām.

Ītĕ prŏcūl, iŭvĕnēs: mītīs mĭhĭ cōnvĕnĭt aētās:

fōllĕ dĕcēt pŭĕrōs ‖ lūdĕrĕ, fōllĕ sĕnēs.

Haēc răpĭt Āntaēī vēlōx īn pūlvĕrĕ draūcūs,

grāndĭă quī vānō ‖ cōllă lăbōrĕ făcīt.

Quīd pĕrĕūnt stūltō fōrtēs hāltērĕ lăcērtī?

Ēxērcēt mĕlĭūs ‖ vīnĕă fōssă vĭrōs.

Nē lŭtĕt īnmūndūm nĭtĭdōs cērōmă căpīllōs,

hāc pŏtĕrīs mădĭdās ‖ cōndĕrĕ pēllĕ cŏmās.

Pērgămŏn hās mīsīt. Cūrvō dēstrīngĕrĕ fērrō:

nōn tām saēpĕ tĕrēt ‖ līntĕă fūllŏ tĭbī.

Gēstāvīt mŏdŏ frōntĕ mē iŭvēncūs:

vērūm rhīnŏcĕrōtă mē pŭtābās.

Nūpĕr ĭn Aūsŏnĭā dŏmĭnī spēctātŭs hărēnā

hīc ĕrĭt īllĕ tĭbī ‖ cuī pĭlă taūrŭs ĕrāt.

Sī quīs plōrātōr cōllō tĭbĭ vērnŭlă pēndēt,

haēc quătĭāt tĕnĕrā ‖ gārrŭlă sīstră mănū.

Prōfĭcĭēs nĭhĭl hōc, caēdās lĭcĕt ūsquĕ, flăgēllō,

sī tĭbĭ pūrpŭrĕō ‖ dē grĕgĕ cūrrĭt ĕquūs.

Quīd mēcum ēst tĭbĭ? Mē pŭēllă sūmāt:

ēmptōs nōn sŏlĕō pŏlīrĕ dēntēs.

Quōd nēc Vērgĭlĭūs nēc cārmĭnĕ dīcĭt Hŏmērūs,

hōc ēx ūnguēntō ‖ cōnstăt ĕt ēx bălănō.

Rūstĭcŭs ēs? Nēscīs quīd Graēcō nōmĭnĕ dīcār:

spūmă vŏcōr nītrī. ‖ Graēcŭs ĕs? Āphrŏnĭtrūm.

Bālsămă mē căpĭūnt, haēc sūnt ūnguēntă vĭrōrūm:

dēlĭcĭās Cōsmī ‖ vōs rĕdŏlētĕ, nŭrūs.

Grātūm mūnŭs ĕrīt scīssō nĕc ĭnūtĭlĕ vēntrī,

sī clārā Stĕphănī ‖ bālnĕă lūcĕ pĕtēs.

Dūx lāntērnă vĭaē clūsīs fĕrŏr aūrĕă flāmmīs,

ēt tūta ēst grĕmĭō ‖ pārvă lŭcērnă mĕō.

Cōrnĕă sī nōn sūm, nūmquīd sūm fūscĭŏr? Aūt mē

vēsīcām, cōntrā ‖ quī vĕnĭt, ēssĕ pŭtāt?

Ēbrĭă nōs mădĭdīs rūmpīt tībīcĭnă būccīs:

saēpĕ dŭās părĭtēr, ‖ saēpĕ mŏnaūlŏn hăbēt.

Quīd mē cōnpāctām cērīs ĕt hărūndĭnĕ rīdēs?

Quaē prīmūm strūcta ēst ‖ fīstŭlă tālĭs ĕrāt.

Dēfŭĕrīt sī fōrtĕ pŭēr sŏlĕāsquĕ lĭbēbīt

sūmĕrĕ, prō pŭĕrō ‖ pēs ĕrĭt īpsĕ sĭbī.

Taūrīnō pŏtĕrās pēctūs cōnstrīngĕrĕ tērgō:

nām pēllīs māmmās ‖ nōn căpĭt īstă tŭās.

Lāmbĕrĕ quaē tūrpēs prŏhĭbēt tŭă prāndĭă mūscās,

ālĭtĭs ēxĭmĭaē ‖ caūdă sŭpērbă fŭīt.

Sōrdĭdă sī flāvō fŭĕrīt tĭbĭ pūlvĕrĕ vēstīs,

cōllĭgăt hūnc tĕnŭī ‖ vērbĕrĕ caūdă lĕvīs.

Pēccāntīs fămŭlī pūgnō nē pērcŭtĕ dēntēs:

clāră Rhŏdōs cōptām ‖ quām tĭbĭ mīsĭt ĕdāt.

Sī vīs ēssĕ sătūr, nōstrūm pŏtĕs ēssĕ Prĭāpūm;

īpsă lĭcēt rōdās ‖ īnguĭnă, pūrŭs ĕrīs.

Īstĕ tĭbī făcĭēt bŏnă Sātūrnālĭă pōrcūs,

īntēr spūmāntēs ‖ īlĭcĕ pāstŭs ăprōs.

Quī vēnīt bŏtŭlūs mĕdĭaē tĭbĭ tēmpŏrĕ brūmaē,

Sātūrnī sēptēm ‖ vēnĕrăt āntĕ dĭēs.

Psīttăcŭs ā vōbīs ălĭōrūm nōmĭnă dīscām:

hōc dĭdĭcī pēr mē ‖ dīcĕrĕ CAĒSĂR HĂVĒ.

Cōrvĕ sălūtātōr, quārē fēllātŏr hăbērīs?

Īn căpŭt īntrāvīt ‖ mēntŭlă nūllă tŭūm.

Flēt Phĭlŏmēlă nĕfās īncēstī Tērĕŏs, ēt quaē

mūtă pŭēllă fŭīt, ‖ gārrŭlă fērtŭr ăvīs.

Pīcă lŏquāx cērtā dŏmĭnūm tē vōcĕ sălūtō:

sī mē nōn vĭdĕās, ‖ ēssĕ nĕgābĭs ăvēm.

Sī tĭbĭ tālĭs ĕrīt, quālēm, dīlēctă Cătūllō

Lēsbĭă, plōrābās, ‖ hīc hăbĭtārĕ pŏtēst.

Ārtĭs ĕbūr mĕdĭcaē nārthēcĭă cērnĭs: hăbēbīs

mūnĕră quaē cŭpĕrēt ‖ Pāccĭŭs ēssĕ sŭă.

Lūdĭtĕ lāscīvī, sēd tāntūm lūdĭtĕ, sērvī:

haēc sīgnātă mĭhī ‖ quīnquĕ dĭēbŭs ĕrūnt.

Īnvīsaē nĭmĭūm pŭĕrīs grātaēquĕ măgīstrīs,

clāră Prŏmēthēō ‖ mūnĕrĕ līgnă sŭmūs.

Nē mēndīcă fĕrāt bārbātī prāndĭă nūdī

dōrmĭăt ēt trīstī ‖ cūm cănĕ, pēră rŏgāt.

Īn prĕtĭō scōpās tēstātūr pālmă fŭīssĕ.

Ōtĭă sēd scōpīs ‖ nūnc ănălēctă dĕdīt.

Dēfēndēt mănŭs haēc scăpŭlās mōrdēntĕ mŏlēstō

pūlĭcĕ, vēl sī quīd ‖ pūlĭcĕ sōrdĭdĭūs.

Nē tŏgă bārbātōs făcĭāt vēl paēnŭlă lībrōs,

haēc ăbĭēs chārtīs ‖ tēmpŏră lōngă dăbīt.

Nōmĭnă dāt spōndaē pīctīs pūlchērrĭmă pīnnīs

nūnc Iūnōnĭs ăvīs, ‖ sēd prĭŭs Ārgŭs ĕrāt.

Strāgŭlă sūccīnctī vēnātōr sūmĕ vĕrēdī:

nām sŏlĕt ā nūdō ‖ sūrgĕrĕ fīcŭs ĕquō.

Āccĭpĕ lūnātā scrīptūm tēstūdĭnĕ sīgmă.

Ōctŏ căpīt; vĕnĭāt ‖ quīsquĭs ămīcŭs ĕrīt.

Fēmĭnĕām nōbīs chērsōn sī crēdĭs ĭnēssĕ,

dēcĭpĕrīs: pĕlăgī ‖ māscŭlă praēdă sŭmūs.

Āccĭpĕ fēlīcēs, Ātlāntĭcă mūnĕră, sīlvās:

aūrĕă quī dĕdĕrīt ‖ dōnă, mĭnōră dăbīt.

Nōn sūm crīspă quĭdēm nēc sīlvaē fīlĭă Maūraē,

sēd nōrūnt laūtās ‖ ēt mĕă līgnă dăpēs.

Grāndĭă taūrōrūm pōrtānt quī cōrpŏră, quaērīs

ān Lĭbўcās pōssīnt ‖ sūstĭnŭīssĕ trăbēs?

Pūnctă nŏtīs īlēx ĕt ăcūtā cūspĭdĕ clūsă

saēpĕ rĕdēmptōrīs ‖ prōdĕrĕ fūrtă sŏlēt.

Nōn ēst īstă rĕcēns, nēc nōstrī glōrĭă caēlī:

prīmŭs ĭn hīs Mēntōr, ‖ dūm făcĭt īllă, bĭbīt.

Nōs sŭmŭs aūdācīs plēbēiă tŏrĕūmătă vītrī,

nōstră nĕque ārdēntī ‖ gēmmă fĕrītŭr ăquā.

Quāmvīs Cāllăĭcō rŭbĕām gĕnĕrōsă mĕtāllō,

glōrĭŏr ārtĕ măgīs: ‖ nām Mўŏs īstĕ lăbōr.

Vīlĭă sūtōrīs călĭcēm mŏnĭmēntă Vătīnī

āccĭpĕ; sēd nāsūs ‖ lōngĭŏr īllĕ fŭīt.

Grāndĭă nē vĭŏlā pārvō chrŷsēndĕtă mūllō:

ūt mĭnĭmūm, lībrās ‖ dēbĕt hăbērĕ dŭās.

Ārrētīnă nĭmīs nē spērnās vāsă mŏnēmūs:

laūtŭs ĕrāt Tūscīs ‖ Pōrsĕnă fīctĭlĭbūs.

Bārbără dē pīctīs vēnī bāscaūdă Brĭtānnīs,

sēd mē iām māvōlt ‖ dīcĕrĕ Rōmă sŭām.

Sī nōn īgnōta ēst dōctī tĭbĭ tērră Cătūllī,

pōtāstī tēstā ‖ Raētĭcă vīnă mĕā.

Cūm mĭhĭ bōlētī dĕdĕrīnt tām nōbĭlĕ nōmēn,

prōtŏtŏmīs - pŭdĕt heū! - ‖ sērvĭŏ cōlĭcŭlīs.

Āccĭpĕ nōn vīlī călĭcēs dē pūlvĕrĕ nātōs,

sēd Sūrrēntīnaē ‖ lēvĕ tŏreūmă rŏtaē.

Sētīnōs, mŏnĕō, nōstrā nĭvĕ frāngĕ trĭēntēs:

paūpĕrĭōrĕ mĕrō ‖ tīngĕrĕ līnă pŏtēs.

Āttĕnŭārĕ nĭvēs nōrūnt ēt līntĕă nōstră:

frīgĭdĭōr cōlō ‖ nōn sălĭt ūndă tŭō.

Frīgĭdă nōn dērīt, nōn dērīt cāldă pĕtēntī.

Sēd tū mōrōsā ‖ lūdĕrĕ pārcĕ sĭtī.

Hīc tĭbĭ dōnātūr pāndā rŭbĕr ūrcĕŭs ānsā.

Stōĭcŭs hōc gĕlĭdām ‖ Frōntŏ pĕtēbăt ăquām.

Nōs Sătўrī, nōs Bācchŭs ămāt, nōs ēbrĭă tīgrīs,

pērfūsōs dŏmĭnī ‖ lāmbĕrĕ dōctă pĕdēs.

Quaē nōn sōllĭcĭtūs tĕnĕāt sērvētquĕ mĭnīstēr

sūmĕ Săgūntīnō ‖ pōcŭlă fāctă lŭtō.

Gēmmātūm Scўthĭcīs ūt lūcĕăt īgnĭbŭs aūrūm

āspĭcĕ. Quōt dĭgĭtōs ‖ ēxŭĭt īstĕ călīx!

Hāc līcēt īn gēmmā, sērvāt quaē nŏmĭnā Cōsmī,

lūxŭrĭōsĕ, bĭbās, ‖ sī fŏlĭātă sĭtīs.

Frāngĕrĕ dūm mĕtŭīs, frāngēs crŷstāllĭnă: pēccānt

sēcūraē nĭmĭūm ‖ sōllĭcĭtaēquĕ mănūs.

Ā Iŏvĕ quī vĕnĭēt, mīscēnda ād pōcŭlă lārgās

fūndēt nīmbŭs ăquās: ‖ hīc tĭbĭ vīnă dăbīt.

Sī cāldūm pōtās, ārdēntī mūrră Fălērnō

cōnvĕnĭt ēt mĕlĭōr ‖ fīt săpŏr īndĕ mĕrō.

Hānc tĭbĭ Cūmānō rŭbĭcūndām pūlvĕrĕ tēstām

mūnĭcĭpēm mīsīt ‖ cāstă Sĭbŷllă sŭām.

Āspĭcĭs īngĕnĭūm Nīlī: quĭbŭs āddĕrĕ plūră

dūm cŭpĭt, āh quŏtĭēns ‖ pērdĭdĭt aūctŏr ŏpūs!

Spōlētīnă bĭbīs vēl Mārsīs cōndĭtă cēllīs:

quō tĭbĭ dēcōctaē ‖ nōbĭlĕ frīgŭs ăquaē?

Nōn pōtārĕ nĭvēm sĕd ăquām pōtārĕ rĕcēntēm

dē nĭvĕ cōmmēnta ēst ‖ īngĕnĭōsă sĭtīs.

Māssĭlĭaē fūmōs mīscērĕ nĭvālĭbŭs ūndīs

pārcĕ, pŭēr, cōnstēt ‖ nē tĭbĭ plūrĭs ăquā.

Dūm pōscōr crĕpĭtū dĭgĭtōrum ēt vērnă mŏrātūr,

ō quŏtĭēns paēlēx ‖ cūlcĭtă fāctă mĕa ēst!

Quāmvīs mē lĭgŭlām dīcānt ĕquĭtēsquĕ pătrēsquĕ,

dīcŏr ăb īndōctīs ‖ līngŭlă grāmmătĭcīs.

Sūm cŏclĕīs hăbĭlīs sēd nēc mĭnŭs ūtĭlĭs ōvīs,

nūmquīd scīs, pŏtĭūs ‖ cūr cŏclĕārĕ vŏcōr?

Āntĕ frĕquēns sēd nūnc rārūs nōs dōnăt ămīcūs.

Fēlīx cuī cŏmĕs ēst ‖ nōn ălĭēnŭs ĕquēs.

Saēpĕ grăvīs dĭgĭtīs ēlābĭtŭr ānŭlŭs ūnctīs,

tūtă mĕā fīēt ‖ sēd tŭă gēmmă fĭdē.

Rōmānōs rērūm dŏmĭnōs gēntēmquĕ tŏgātām

īllĕ făcīt, māgnō ‖ quī dĕdĭt āstră pătrī.

Sī mātūtīnōs făcĭlēst tĭbĭ pērdĕrĕ sōmnōs

āttrītā vĕnĭēt ‖ spōrtŭlă saēpĕ tŏgā.

Paūpĕrĭs ēst mūnūs sēd nōn ēst paūpĕrĭs ūsūs:

hānc tĭbĭ prō laēnā ‖ mīttĭmŭs ēndrŏmĭdă.

Haēc tĭbĭ tūrbātō Cănŭsīnă sĭmīllĭmă mūlsō

mūnŭs ĕrīt. Gaūdē: ‖ nōn cĭtŏ fīĕt ănūs.

Gāllĭă Sāntŏnĭcō vēstīt tē bārdŏcŭcūllō.

Cērcŏpĭthēcōrūm ‖ paēnŭlă nūpĕr ĕrāt.

Rōmă măgīs fūscīs vēstītūr, Gāllĭă rūfīs,

ēt plăcĕt hīc pŭĕrīs ‖ mīlĭtĭbūsquĕ cŏlōs.

Īngrĕdĭārĕ vĭām caēlō lĭcĕt ūsquĕ sĕrēnō,

ād sŭbĭtās nūsquām ‖ scōrtĕă dēsĭt ăquās.

Sī vĕnĕtō prăsĭnōvĕ făvēs, quīd cōccĭnă sūmēs?

Nē fīās īstā ‖ trānsfŭgă sōrtĕ vĭdē.

Sī pōssēm, tōtās cŭpĕrēm mīsīssĕ lăcērnās:

nūnc tāntūm căpĭtī ‖ mūnĕră mīttŏ tŭō.

Nōn ēst lānă mĭhī mēndāx nēc mūtŏr ăhēnō.

Sīc plăcĕānt Tўrĭaē: ‖ mē mĕă tīnxĭt ŏvīs.

Fāscĭă crēscēntēs dŏmĭnaē cōmpēscĕ păpīllās,

ūt sīt quōd căpĭāt ‖ nōstră tĕgātquĕ mănūs.

Āmphĭthĕātrālī nōs cōmmēndāmŭs ăb ūsū,

cūm tĕgĕt ālgēntēs ‖ ālbă lăcērnă tŏgās.

Nēc fŏră sūnt nōbīs nēc sūnt vădĭmōnĭă nōtă:

hōc ŏpŭs ēst, pīctīs ‖ āccŭbŭīssĕ tŏrīs.

Sī rĕcĭtātūrūs dĕdĕrō tĭbĭ fōrtĕ lĭbēllūm,

hōc fōcālĕ tŭās ‖ ādsĕrăt aūrĭcŭlās.

Tēmpŏrĕ brūmālī nōn mūltūm lēvĭă prōsūnt:

cālfăcĭūnt vīllī ‖ pāllĭă vēstră mĕī.

Nōbĭlĭūs vīllōsă tĕgānt tĭbĭ līntĕă cītrūm:

ōrbĭbŭs īn nōstrīs ‖ cīrcŭlŭs ēssĕ pŏtēst.

Iūngĕrĕ nēscīstī nōbīs, ō stūltĕ, lăcērnās:

īndŭĕrās ālbās, ‖ ēxŭĕ cāllăĭnās.

Nōn hōs lānă dĕdīt sĕd ŏlēntīs bārbă mărītī:

Cīnўphĭō pŏtĕrīt ‖ plāntă lătērĕ sĭnū.

Dūm tŏgă pēr quīnās gaūdēt rĕquĭēscĕrĕ lūcēs,

hōs pŏtĕrīs cūltūs ‖ sūmĕrĕ iūrĕ tŭō.

Vēllĕră cōnsūmūnt Pătăvīnaē mūltă trĭlīcēs,

ēt pīnguēs tŭnĭcās ‖ sērră sĕcārĕ pŏtēst.

Haēc tĭbĭ sōrtĕ dătūr tērgēndīs spōngĕă mēnsīs

ūtĭlĭs, ēxprēssō ‖ cūm lĕvĭs īmbrĕ tŭmēt.

Īs mĭhĭ cāndŏr ĭnēst, vīllōrūm grātĭă tāntă,

ūt mē vēl mĕdĭā ‖ sūmĕrĕ mēssĕ vĕlīs.

Tīnguĕ căpūt Cōsmī fŏlĭō, cērvīcăl ŏlēbīt:

pērdĭdĭt ūnguēntūm ‖ cūm cŏmă, plūmă tĕnēt.

Strāgŭlă pūrpŭrĕīs lūcēnt vīllōsă tăpētīs.

Quīd prōdēst sī tē ‖ cōngĕlăt ūxŏr ănūs?

Nūdō strāgŭlă nē tŏrō pătērēnt,

iūnctaē nōs tĭbĭ vēnĭmūs sŏrōrēs.

Māmmōsās mĕtŭō; tĕnĕraē mē trādĕ pŭēllaē,

ūt pōssīnt nĭvĕō ‖ pēctŏrĕ līnă frŭī.

Haēc tĭbĭ Mēnphītīs tēllūs dāt mūnĕră: vīcta ēst

pēctĭnĕ Nīlĭăcō ‖ iām Băbўlōnŏs ăcūs.

Lōngă sătīs nūnc sūm; dūlcī sēd pōndĕrĕ vēntēr

sī tŭmĕāt, fīām ‖ tūnc tĭbĭ zōnă brĕvīs.

Lōdīcēs mīttēt dōctī tĭbĭ tērră Cătūllī;

nōs Hĕlĭcāŏnĭā ‖ dē rĕgĭōnĕ sŭmūs.

Dēt tŭnĭcām lŏcŭplēs: ĕgŏ tē praēcīngĕrĕ pōssūm.

Ēssēm sī lŏcŭplēs, ‖ mūnŭs ŭtrūmquĕ dărēm.

Ēbrĭă Sīdŏnĭaē cūm sīm dē sānguĭnĕ cōnchaē,

nōn vĭdĕō quārē ‖ sōbrĭă lānă vŏcēr.

Vēllĕrĭbūs prīmīs Āpūlĭă, Pārmă sĕcūndīs

nōbĭlĭs: Āltīnūm ‖ tērtĭă laūdăt ŏvīs.

Nōs Lăcĕdaēmŏnĭaē pāstōr dōnāvĭt ămīcaē:

dētĕrĭōr Lēdaē ‖ pūrpŭră mātrĭs ĕrāt.

Nōn tāntūm pūllō lūgēntēs vēllĕrĕ lānās,

sēd sŏlĕt ēt călĭcēs ‖ haēc dărĕ tērră sŭōs.

Lānă quĭdēm trīstīs sēd tōnsīs nētă mĭnīstrīs,

quālēs nōn prīmō ‖ dē grĕgĕ mēnsă cĭtāt.

Ōpprēssaē nĭmĭūm vīcīna ēst fāscĭă plūmaē?

Vēllĕră Leūcŏnĭcīs ‖ āccĭpĕ rāsă săgīs.

Tōmēntūm cōncīsă pălūs Cīrcēnsĕ vŏcātūr.

Haēc prō Leūcŏnĭcō ‖ strāmĭnă paūpĕr ĕmīt.

Lāssŭs Ămŷclaēā pŏtĕrīs rĕquĭēscĕrĕ plūmā,

īntĕrĭōr cŷcnī ‖ quām tĭbĭ lānă dĕdīt.

Fraūdātā tŭmĕāt frăgĭlīs tĭbĭ cūlcĭtă mūlā.

Nōn vĕnĭt ād dūrōs ‖ pāllĭdă cūră tŏrōs.

Rēddĕ pĭlām: sŏnăt aēs thērmārūm. Lūdĕrĕ pērgīs?

Vīrgĭnĕ vīs sōlā ‖ lōtŭs ăbīrĕ dŏmūm.

Splēndĭdă cūm vŏlĭtānt Spārtānī pōndĕră dīscī,

ēstĕ prŏcūl, pŭĕrī: ‖ sīt sĕmĕl īllĕ nŏcēns.

Rēddĭdĭt Eūrўdĭcēn vātī: sēd pērdĭdĭt īpsĕ,

dūm sĭbĭ nōn crēdīt ‖ nēc pătĭēntĕr ămāt.

Dē Pōmpēiānō saēpe ēst ēiēctă thĕātrō

quaē dūxīt sīlvās ‖ dētĭnŭītquĕ fĕrās.

Fērvĭdă nē trītō tĭbĭ pōllĭcĕ pūsŭlă sūrgāt,

ēxōrnēnt dŏcĭlēm ‖ cāndĭdă plēctră lўrām.

Īndūcēndă rŏta ēst: dās nōbīs ūtĭlĕ mūnūs:

īstĕ trŏchūs pŭĕrīs ‖ āt mĭhĭ cānthŭs ĕrīt.

Gārrŭlŭs īn lāxō cūr ānŭlŭs ōrbĕ văgātūr?

Cēdăt ŭt ārgūtīs ‖ ōbvĭă tūrbă trŏchīs.

Haēc īllī sĭnĕ sōrtĕ dătūr cuī nōmĭnă Rhēnūs

vēră dĕdīt. Dĕcĭēns ‖ āddĕ Fălērnă, pŭēr.

Glōrĭă tām pārvī nōn ēst ōbscūră sĭgīllī:

īstīūs pŭĕrī ‖ Brūtŭs ămātŏr ĕrāt.

Ād tē rēptāndī, pŭĕr īnsĭdĭōsĕ, lăcērtaē

pārcĕ; cŭpīt dĭgĭtīs ‖ īllă pĕrīrĕ tŭīs.

Flēctĭt ăb īnvīsō mŏrĭēntĭă lūmĭnă dīscō

Oēbălĭūs, Phoēbī ‖ cūlpă dŏlōrquĕ, pŭēr.

Māscŭlŭs īntrāvīt fōntīs: ēmērsĭt ŭtrūmquĕ:

pārs ēst ūnă pătrīs, ‖ cētĕră mātrĭs hăbēt.

Cūr ā tē prĕtĭūm Dănăē, rēgnātŏr Ŏlŷmpī,

āccēpīt, grātīs ‖ sī tĭbĭ Lēdă dĕdīt?

Sūm fĭgŭlī lūsūs rūssī pērsōnă Bătāvī.

Quaē tū dērīdēs, ‖ haēc tĭmĕt ōră pŭēr.

Ēlīdīt gĕmĭnōs īnfāns nēc rēspĭcĭt ānguīs.

Iām pŏtĕrāt tĕnĕrās ‖ hŷdră tĭmērĕ mănūs.

Sūm frăgĭlīs: sēd tū, mŏnĕō, nē spērnĕ sĭgīllūm:

nōn pŭdĕt Ālcīdēn ‖ nōmĕn hăbērĕ mĕūm.

Dīc mĭhĭ, vīrgŏ fĕrōx, cūm sīt tĭbĭ cāssĭs ĕt hāstā,

quārē nōn hăbĕās ‖ aēgĭdă. "Caēsăr hăbēt".

Mūtārī mĕlĭūs taūrō, pătĕr ōptĭmĕ dīvūm,

tūnc pŏtĕrās Īō ‖ cūm tĭbĭ vāccă fŭīt.

Clāmābāt tŭmĭdīs aūdāx Lēāndrŏs ĭn ūndīs:

"Mērgĭtĕ mē flūctūs ‖ cūm rĕdĭtūrŭs ĕrō".

Ēbrĭŭs haēc fēcīt tērrīs, pŭtŏ, mōnstră Prŏmētheūs:

Sātūrnālĭcĭō ‖ lūsĭt ĕt īpsĕ lŭtō.

Pērlĕgĕ Maēŏnĭō cāntātās cārmĭnĕ rānās

ēt frōntēm nūgīs ‖ sōlvĕrĕ dīscĕ mĕīs.

Īlĭăs ēt Prĭămī rēgnīs ĭnĭmīcŭs Ŭlīxēs

mūltĭplĭcī părĭtēr ‖ cōndĭtă pēllĕ lătēnt.

Āccĭpĕ fācūndī Cŭlĭcēm, stŭdĭōsĕ, Mărōnīs,

nē nŭcĭbūs pŏsĭtīs ‖ "Ārmă vĭrūmquĕ" lĕgās.

Quām brĕvĭs īnmēnsūm cēpīt mēmbrānă Mărōnēm

īpsīūs vūltūs ‖ prīmă tăbēllă gĕrīt.

Hāc prīmūm iŭvĕnūm lāscīvōs lūsĭt ămōrēs;

nēc Glўcĕrā pŭĕrī, ‖ Thāĭs ămīcă fŭīt.

Sī cŏmĕs īstă tĭbī fŭĕrīt mēmbrānă, pŭtātō

cārpĕrĕ tē lōngās ‖ cūm Cĭcĕrōnĕ vĭās.

Cŷnthĭă - fācūndī cārmēn iŭvĕnālĕ Prŏpērtī -

āccēpīt fāmām, ‖ nōn mĭnŭs īpsă dĕdīt.

Pēllĭbŭs ēxĭgŭīs ārtātūr Līvĭŭs īngēns,

quēm mĕă nōn tōtūm ‖ bīblĭŏthēcă căpīt.

Hīc ĕrĭt, ūt pĕrhĭbēnt dōctōrūm cōrdă vĭrōrūm,

prīmūs Rōmānā ‖ Crīspŭs ĭn hīstŏrĭā.

Haēc tĭbĭ mūltĭplĭcī quaē strūcta ēst māssă tăbēllā,

cārmĭnă Nāsōnīs ‖ quīnquĕ dĕcēmquĕ gĕrīt.

Ūssĭt ămātōrēm Nĕmĕsīs lāscīvă Tĭbūllūm,

īn tōtā iūvīt ‖ quēm nĭhĭl ēssĕ dŏmō.

Sūnt quīdām quī mē dīcānt nōn ēssĕ pŏētām:

sēd quī mē vēndīt ‖ bŷblĭŏpōlă pŭtāt.

Tāntūm māgnă sŭō dēbēt Vērōnă Cătūllō,

quāntūm pārvă sŭō ‖ Māntŭă Vērgĭlĭō.

Haēc tĭbĭ quaē fōntēs ĕt ăquārūm nōmĭnă dīcīt,

īpsă sŭās mĕlĭūs ‖ chārtă nătābăt ăquās.

Hīs tĭbĭ dē mūlīs nōn ēst mĕtŭēndă rŭīnă:

āltĭŭs īn tērrā ‖ saēpĕ sĕdērĕ sŏlēs.

Dēlĭcĭās pārvaē sī vīs aūdīrĕ cătēllaē,

nārrāntī brĕvĭs ēst ‖ pāgĭnă tōtă mĭhī.

Hīc brĕvĭs ād nŭmĕrōs răpĭdūm quī cōllĭgĭt ūnguēm,

vēnĭt ăb aūrĭfĕrīs ‖ gēntĭbŭs Āstŭr ĕquūs.

Nōn sĭbĭ sēd dŏmĭnō vēnātūr vērtrăgŭs ācēr,

īnlaēsūm lĕpŏrēm ‖ quī tĭbĭ dēntĕ fĕrēt.

Nōn ămŏ quōd vīncāt, sēd quōd sūccūmbĕrĕ nōvīt

ēt dĭdĭcīt mĕlĭūs ‖ tēn ĕpĭklīnŏpălēn.

Cāllĭdŭs ēmīssās ēlūdĕrĕ sīmĭŭs hāstās,

sī mĭhĭ caūdă fŏrēt, ‖ cērcŏpĭthēcŭs ĕrām.

Tām trĕmŭlūm crīsāt, tām blāndūm prūrĭt, ŭt īpsūm

māstūrbātōrēm ‖ fēcĕrĭt Hīppŏlўtūm.

Aēră Cĕlaēnaēōs lūgēntĭă mātrĭs ămōrēs

ēsŭrĭēns Gāllūs ‖ vēndĕrĕ saēpĕ sŏlēt.

Sīt nōbīs aētātĕ pŭēr, nōn pūmĭcĕ lēvīs,

prōptēr quēm plăcĕāt ‖ nūllă pŭēllă mĭhī.

Cōllō nēctĕ, pŭēr, mĕrōs ămōrēs,

cēstōn dē Vĕnĕrīs sĭnū călēntēm.

Sūmĕ Cўthērĭăcō mĕdĭcātūm nēctărĕ cēstōn:

ūssĭt ămātōrēm ‖ bāltĕŭs īstĕ Iŏvēm.

Cūrrānt vērbă lĭcēt, mănŭs ēst vēlōcĭŏr īllīs:

nōndūm līnguă sŭūm, ‖ dēxtră pĕrēgĭt ŏpūs.

Lēvĭs ăb aēquŏrĕā cōrtēx Mărĕōtĭcă cōnchā

fīăt: ĭnōffēnsā ‖ cūrrĕt hărūndŏ vĭā.

Nōn mēndāx stŭpŏr ēst nēc fīngĭtŭr ārtĕ dŏlōsā.

Quīsquīs plūs iūstō ‖ nōn săpĭt, īllĕ săpīt.

Mōllĭă Phrīxēī sĕcŭīstī cōllă mărītī.

Hōc mĕrŭīt tŭnĭcām ‖ quī tĭbĭ, saēvĕ, dĕdīt?

Sī sōlūm spēctēs hŏmĭnīs căpŭt, Hēctŏră crēdās:

sī stāntēm vĭdĕās, ‖ Āstўănāctă pŭtēs.

Haēc, quaē saēpĕ sŏlēt vīncī, quaē vīncĕrĕ rārō,

pārmă tĭbī, scūtūm ‖ pūmĭlĭōnĭs ĕrīt.

Nōn ĕrĭt īn tūrbā quīsquām Μιˉσούˉμε˘νο˘ς īstā:

sēd pŏtĕrīt quīvīs ‖ ēssĕ Δὶ˘ς ἐˉξα˘πα˘τῶˉν.

Dīc mĭhĭ sīmplĭcĭtēr, cōmoēdīs ēt cĭthăroēdīs,

fībŭlă, quīd praēstās? ‖ "Cārĭŭs ūt fŭtŭānt".

Nōn tāntūm călămīs sēd cāntū fāllĭtŭr ālēs,

cāllĭdă dūm tăcĭtā ‖ crēscĭt hărūndŏ mănū.

Praēdŏ fŭīt vŏlŭcrūm: fămŭlūs nūnc aūcŭpĭs īdēm

dēcĭpĭt ēt cāptās ‖ nōn sĭbĭ maērĕt ăvēs.

Dīc quŏtŭs ēt quāntī cŭpĭās cēnārĕ nĕc ūnūm

āddĭdĕrīs vērbūm: ‖ cēnă părātă tĭbi ēst.

Paūpēr caūsĭdĭcūs nūllōs rĕfĕrēntĭă nūmmōs

cārmĭnă cūm scrībās, ‖ āccĭpĕ cōr, quŏd hăbēs.

Nōn sătĭs ēst ārs sōlă cŏcō: sērvīrĕ pălātūm

nōlŏ: cŏcūs dŏmĭnī ‖ dēbĕt hăbērĕ gŭlām.

Rāră tĭbī cūrvā crātīcŭlă sūdĕt ŏfēllā;

spūmĕŭs īn lōngā ‖ cūspĭdĕ fūmĕt ăpēr.

Mīllĕ tĭbī dūlcēs ŏpĕrūm mănŭs īstă fĭgūrās

ēxstrŭĕt: huīc ūnī ‖ pārcă lăbōrăt ăpīs.

Sūrgĭtĕ: iām vēndīt pŭĕrīs iēntācŭlă pīstōr

crīstātaēquĕ sŏnānt ‖ ūndĭquĕ lūcĭs ăvēs.