INCERTI AUCTORIS - PRECATIO OMNIUM HERBARUM


10

Nunc vos potentes omnes herbas deprecor.

Exoro maiestatem vestram, quas parens

tellus generavit et cunctis dono dedit:

medicinam sanitatis in vos contulit

5maiestatemque, ut omni generi identidem

humano sitis auxilium utilissimum.

Hoc supplex exposco et precor: velocius

huc huc adeste cum vestris virtutibus,

quia, quae creavit, ipsa permisit mihi,

10ut colligam vos; favit hic etiam, cui

medicina tradita est. Quantumque vestra nunc

virtus potest, praestate medicinam bonam

causa salutis. Gratiam, precor, mihi

praestetis per virtutem vestram, ut omnibus

15in rebus, quicquid ex vobis ego fecero,

cuive homini dedero, habeatis eventus bonos

et effectum celerrimum. Ut semper mihi

liceat favente maiestate vestra vos

colligere, ...

20ponamque vobis fruges et grates agam

per nomen Matris, quae vos iussit nascier.