- Ἤδη δ' Ἰλλυρίης Ταυλάντιον ἔθνος ἀρούρης

καὶ πέδον Αἱμονίης καὶ Πήλιον ἄκρον ἐάσσας

Ἑλλάδος ἐγγὺς ἵκανε, καὶ Ἀονίῃ παρὰ πέζῃ

στῆσε χορούς. ἀίων δὲ μέλος μυκήτορος αὐλοῦ

   5Πανὶ Ταναγραίῳ θιάσους ἐστήσατο ποιμήν·

καὶ κρήνη κελάδησεν, ὅπῃ χθονὸς ἄκρον ἀράξας

ὑγρὸς ὄνυξ ἵππειος ἐπώνυμον ἔγλυφεν ὕδωρ·

Ἀσωπὸς δ' ἐχόρευε πυρίπνοα χεύματα σύρων

καὶ προχοὰς ἐλέλιξε· σὺν Ἰσμηνῷ δὲ τοκῆι

  10κυκλάδας αἰθύσσουσα ῥοὰς ὠρχήσατο Δίρκη.

καί ποτέ τις δρυόεντος ἀναΐξασα κορύμβου

ἡμιφανὴς ἐλίγαινεν Ἁμαδρυὰς ὑψόθι δένδρου,

οὔνομα κυδαίνουσα κορυμβοφόρου Διονύσου·

πηγαίη δ' ὁμόφωνος ἀσάμβαλος ἴαχε Νύμφη.

  15- καὶ κτύπος οὐρεσίφοιτος ἀδεψήτοιο βοείης

Πενθέος ἀσπόνδοισιν ἐπεσμαράγησεν ἀκουαῖς·

οἰνοφόρῳ δ' ἀθέμιστος ἄναξ ἐπεχώσατο Βάκχῳ,

καὶ στρατιὴν ἐκόρυσσε μαχήμονα, κέκλετο δ' ἄλλοις

ἄστεος ἑπταπόροιο περιφράξαι πυλεῶνας·

  20οἱ μὲν ἐπεκλήισαν ἀμοιβαδίς, ἐξαπίνης δὲ

αὐτόματοι κληῗδες ἀνωΐγνυντο πυλάων,

καὶ δολιχοὺς πυλεῶνι μάτην ἐπέβαλλον ὀχῆας

ἠερίοις θεράποντες ἐριδμαίνοντες ἀήταις.

οὐ τότε τις πυλαωρὸς ἰδὼν ἀνεσείρασε Βάκχην·

  25Σιληνοὺς δὲ γέροντας ἀτευχέας ἀσπιδιῶται

ἔτρεμον αἰχμητῆρες· ὁμογλώσσῳ δ' ἀλαλητῷ

κεκλομένου βασιλῆος ἀφειδήσαντες ἀπειλῆς

πολλάκις ὠρχήσαντο, σὺν εὐτύκτοις δὲ βοείαις

κυκλάδος ἐστήσαντο σακεσπάλον ἅλμα χορείης,

  30ἀντίτυπον μίμημα φιλοσμαράγων Κορυβάντων.

φρικαλέαι δ' ἰάχησαν ἐν οὔρεσι λυσσάδες ἄρκτοι·

καὶ γένυν αἰθύσσουσα καὶ ὑψιπότητον ἐρωὴν ...

πόρδαλις ᾐώρητο· λέων δέ τις ἁβρὸν ἀθύρων

μειλίχιον βρύχημα συνήλικι πέμπε λεαίνῃ.

  35- ἤδη δ' αὐτοέλικτος ἐσείετο Πενθέος αὐλὴ

ἀκλινέων σφαιρηδὸν ἀναΐσσουσα θεμέθλων·

καὶ πυλεὼν δεδόνητο θορὼν ἐνοσίχθονι παλμῷ,

πήματος ἐσσομένοιο προάγγελος· αὐτόματος δὲ

λάινος Ὀγκαίης ἐλελίζετο βωμὸς Ἀθήνης,

  40ὅν ποτε Κάδμος ἔδειμεν, ὅτε βραδυπειθέι ῥιπῇ

μόσχου πυργοδόμοιο φερέπτολις ὤκλασε χηλή·

ἀμφὶ δὲ θεῖον ἄγαλμα πολισσούχοιο θεαίνης

αὐτομάτῃ ῥαθάμιγγι θεόσσυτος ἔβλυεν ἱδρὼς

δεῖμα φέρων ναέτῃσι· καὶ ἐκ ποδὸς ἄχρι καρήνου

  45ἄγγελον ἐσσομένων βρέτας Ἄρεος ἔρρεε λύθρῳ.

- καὶ ναέται δεδόνηντο· φόβῳ δ' ἐλελίζετο μήτηρ

Πενθέος αὐχήεντος, ἐβακχεύθη δὲ μενοινήν,

μνησαμένη προτέροιο δαφοινήεντος ὀνείρου

πικρὰ προθεσπίζοντος, ἐπεὶ πάρος ὑψόθι λέκτρων,

  50ἐξότε κοιρανίην πατρώιον ἥρπασε Πενθεύς,

πάννυχον ὑπναλέοις ὀάροις εὕδουσαν Ἀγαύην

φάσματα μιμηλοῖο διεπτοίησεν ὀνείρου,

ἀπλανέος θρῴσκοντα δι' εὐκεράου πυλεῶνος·

ἔλπετο γὰρ Πενθῆα χοροίτυπον ἁβρὸν ὁδίτην

  55ἄρσενα κοσμήσαντα γυναικείῳ χρόα πέπλῳ

ῥῖψαι πορφυρόνωτον ἐπὶ χθόνα φᾶρος ἀνάκτων,

θύρσον ἐλαφρίζοντα καὶ οὐ σκήπτροιο φορῆα·

καί μιν ἰδεῖν ἐδόκησε πάλιν Καδμηὶς Ἀγαύη

ἑζόμενον σκιεροῖο μετάρσιον ὑψόθι δένδρου·

  60καὶ φυτὸν ὑψικάρηνον, ὅπῃ θρασὺς ἕζετο Πενθεύς,

θῆρες ἐκυκλώσαντο, καὶ ἄγριον εἶχον ἐρωὴν

δένδρον ἀπειλητῆρι μετοχλίζοντες ὀδόντι

τρηχαλέαις γενύεσσι· τινασσομένοιο δὲ δένδρου

κύμβαχος αὐτοκύλιστος ἕλιξ δινεύετο Πενθεύς,

  65καί μιν ἐδηλήσαντο τεθηπότα μαινάδες ἄρκτοι·

ἀγροτέρη δὲ λέαινα διαΐσσουσα προσώπου

πρυμνόθεν ἔσπασε χεῖρα, καὶ ἄσχετα μαινομένη θὴρ

ἡμιτόμου Πενθῆος ἐρεισαμένη πόδα λαιμῷ

θηγαλέοις ὀνύχεσσι διέθρισεν ἀνθερεῶνα,

  70αἱμαλέον δὲ κάρηνον ἐκούφισεν ἅρπαγι ταρσῷ

οἰκτρὰ δαϊζομένου, καὶ ἐδείκνυε μάρτυρι Κάδμῳ

παλλομένη, βροτέην δ' ἀλιτήμονα ῥήξατο φωνήν·

- εἰμὶ τεὴ θυγάτηρ θηροκτόνος· εἰμὶ δὲ μήτηρ

Πενθέος ὀλβίστοιο, τεὴ φιλότεκνος Ἀγαύη.

  75τηλίκον ὤλεσα θῆρα· λεοντοφόνοιο δὲ νίκης

δέχνυσο τοῦτο κάρηνον ἐμῆς πρωτάγριον ἀλκῆς·

τηλίκον οὔ ποτε θῆρα κατέκτανε σύγγονος Ἰνώ,

οὐ κτάνεν Αὐτονόη· σὺ δὲ σύμβολα παιδὸς Ἀγαύης

πῆξον ἀριστοπόνοιο τεοῦ προπάροιθε μελάθρου.

  80- τοῖον ὄναρ βλοσυρωπὸν ὑπόχλοος εἶδεν Ἀγαύη.

ἔνθεν ἐριπτοίητος ἀπωσαμένη πτερὸν Ὕπνου,

ὀρθρινὴ καλέσασα θεηγόρον υἷα Χαρικλοῦς,

μάντιας ἐσσομένων φονίους ἐδίδαξεν ὀνείρους·

Τειρεσίας δ' ἐκέλευσε θεοπρόπος ἄρσενα ῥέξαι

  85ταῦρον, ἀοσσητῆρα δαφοινήεντος ὀνείρου,

Ζηνὸς ἀλεξικάκοιο θεοκλήτῳ παρὰ βωμῷ,

μηκεδανῆς ἐλάτης παρὰ δένδρεον, ἧχι Κιθαιρὼν

πέπταται ὑψικάρηνος· Ἁμαδρυάδεσσι δὲ Νύμφαις

θῆλυν ὄιν σήμαινε θυηπολέειν παρὰ λόχμῃ.

  90ἔγνω δ' ἔμφρονα θῆρα καὶ ἀγρώσσουσαν Ἀγαύην

γαστρὸς ἑῆς ὠδῖνα καὶ ὠλεσίτεκνον ἀγῶνα

καὶ κεφαλὴν Πενθῆος· ἐν ἀφθόγγῳ δὲ σιωπῇ

κρύψεν ὀνειρείης ἀπατήλιον εἰκόνα νίκης,

Πενθέα μὴ βαρύμηνιν ἑὸν βασιλῆα χαλέψῃ.

  95πειθομένη δὲ γέροντι σοφῷ φιλότεκνος Ἀγαύη

εἰς ὄρος ὑψικάρηνον ὁμόστολος ἤιε Κάδμῳ,

ἧχι Διὸς πέλεν ἄλσος ὀρειάδος ἔμπλεον ὕλης,

Πενθέος ἑσπομένοιο· καὶ εὐκεράῳ παρὰ βωμῷ

θῆλυν ὄιν κερόεντι συνέμπορον ἄρσενι ταύρῳ

 100Ζηνὶ καὶ Ἀδρυάδεσσι μίαν ξύνωσε θυηλὴν

Κάδμος Ἀγηνορίδης, θεοτερπέα βωμὸν ἀνάψας,

ῥέζων ἀμφοτέροισιν· ἀναπτομένοιο δὲ πυρσοῦ

κνίση μὲν περίφοιτος ἕλιξ συνενήχετο καπνῷ

εὐόδμῳ στροφάλιγγι, δαϊζομένου δ' ἄρα ταύρου

 105ὄρθιος αἱμαλέης αὐτόσσυτος αὐλὸς ἐέρσης

χεῖρας ἐρευθιόωντι φόνῳ πόρφυρεν Ἀγαύης·

αὐχένιον δὲ τένοντα πέριξ στεφανηδὸν ἑλίξας

οἰδαλέην ἐπίκυρτον ἑὴν δοχμώσατο δειρὴν

μείλιχος εἱλικόεντι δράκων μιτρούμενος ὁλκῷ,

 110στέμματι δ' ὁλκαίῳ κεφαλὴν κυκλώσατο Κάδμου

πρηῢς ὄφις, καὶ γλῶσσα πέριξ λίχμαζεν ὑπήνην

μειλιχίων φίλον ἰὸν ἀποπτύουσα γενείων

οἰγομένων· καὶ θῆλυς ὄφις μιτρώσατο κόρσην

Ἁρμονίης ξανθοῖσι περιπλεχθεῖσα κορύμβοις.

 115καὶ διδύμων ὀφίων πετρώσατο γυῖα Κρονίων,

ὅττι παρ' Ἰλλυρικοῖο δρακοντοβότου στόμα πόντου

Ἁρμονίη καὶ Κάδμος ἀμειβομένοιο προσώπου

λαϊνέην ἤμελλον ἔχειν ὀφιώδεα μορφήν.

καὶ φόβον ἄλλον ἔχουσα μετὰ προτέρου φόβον ὕπνου

 120νόστιμος εἰς δόμον ἦλθε σὺν υἱέι καὶ γενετῆρι.

- τοῖον ἴδεν ποτὲ φάσμα, καὶ ὀμφήεντος ὀνείρου

μνησαμένη δεδόνητο φόβῳ φιλότεκνος Ἀγαύη.

- ἤδη δ' ἑπταπόροιο δι' ἄστεος ἵπτατο Φήμη

ὄργια κηρύσσουσα χοροπλεκέος Διονύσου·

 125οὐδέ τις ἦν ἀχόρευτος ἀνὰ πτόλιν· ἀγρονόμων δὲ ...

εἰαρινοῖς πετάλοισιν ἐμιτρώθησαν ἀγυιαί·

καὶ θάλαμον Σεμέλης χλοερῷ σκιόωσα κορύμβῳ

νυμφιδίου σπινθῆρος ἔτι πνείοντα κεραυνοῦ

αὐτοφυὴς ἐμέθυσσεν ἕλιξ εὐώδεϊ καρπῷ.

 130φρικτὰ δὲ παπταίνων πολυειδέα θαύματα Βάκχου,

ζῆλον ἔχων ὑπέροπλον, ἄναξ κυμαίνετο Πενθεύς.

- καὶ κενεῆς προχέων ὑπερήνορα κόμπον ἀπειλῆς

τοῖον ἔπος δμώεσσιν ἀτάσθαλος ἴαχε Πενθεύς·

- Λυδὸν ἐμὸν θεράποντα κομίσσατε, θῆλυν ἀλήτην,

 135δαινυμένου Πενθῆος ὑποδρηστῆρα τραπέζης,

οἰνοδόκῳ ποτὸν ἄλλο διαστάζοντα κυπέλλῳ,

ἢ γλάγος ἢ γλυκὺ χεῦμα ‹φιλοπτόρθοιο μελίσσης.›

.............. κασιγνήτην δὲ τεκούσης

Αὐτονόην πληγῇσιν ἀμοιβαίῃσιν ἱμάσσω·

 140κύμβαλα δ' ἠχήεντα διαρρίψαντες ἀήταις

καὶ πάταγον Βερέκυντα καὶ εὔια τύμπανα Ῥείης

ἕλκετε Βασσαρίδας μανιώδεας, ἕλκετε Βάκχας,

ἀμφιπόλους Βρομίοιο συνήλυδας, ἃς ἐνὶ Θήβῃ

Ἰσμηνοῦ διεροῖσιν ἀκοντίζοντες ἐναύλοις

 145Νηΐδας Ἀονίαις ποταμηΐσι μίξατε Νύμφαις

ἥλικας, Ἀδρυάδας δὲ γέρων δέξοιτο Κιθαιρὼν

ἄλλαις Ἀδρυάδεσσιν ὁμόζυγας ἀντὶ Λυαίου.

καὶ πλοκάμους τμήξωμεν ἀκερσικόμου Διονύσου·

ἄξατε πῦρ, θεράποντες, ἐπεὶ ποινήτορι θεσμῷ,

 150ἐκ πυρὸς εἰ πέλε Βάκχος, ἐγὼ πυρὶ Βάκχον ὀπάσσω·

Ζεὺς Σεμέλην ἐδάμασσεν, ἐγὼ Διόνυσον ὀλέσσω.

εἰ δέ κε πειρήσαιτο καὶ ἡμετέροιο κεραυνοῦ,

γνώσεται, οἷον ἔχω χθόνιον σέλας· οὐρανίου γὰρ

θερμοτέρους σπινθῆρας ἐμὸν λάχεν ἀντίτυπον πῦρ·

 155σήμερον αἰθαλόεντα τὸν ἀμπελόεντα τελέσσω.

εἰ δὲ μόθον στήσειε μαχήμονα θύρσον ἀείρων,

γνώσεται, οἷον ἔχω χθόνιον δόρυ· καί μιν ὀλέσσω,

οὐ ποδός, οὐ λαγόνων, οὐ στήθεος, οὐ κενεώνων

ὠτειλὴν μεθέποντα· καὶ οὐ βουπλῆγι δαΐξω

 160κυρτὰ βοοκραίροιο κεράατα δισσὰ μετώπου,

οὐδὲ διατμήξω μέσον αὐχένος· ἀλλά ἑ τύψω

ἔγχεϊ χαλκείῳ τετορημένον εἰς πτύχα μηροῦ,

ὅττι Διὸς μεγάλοιο γονὴν ἐψεύσατο μηροῦ

καὶ πόλον ὡς ἑὸν οἶκον· ἐγὼ δέ μιν ἀντὶ μελάθρου,

 165ἀντὶ Διὸς πυλεῶνος ἐνέρτερον Ἄιδι πέμψω,

ἠέ μιν αὐτοκύλιστον ἀλυσκάζοντα καλύψω

κύμασιν Ἰσμηνοῖο, καὶ οὐ χρέος ἐστὶ θαλάσσης.

οὐ δέχομαι βροτὸν ἄνδρα νόθον θεόν· εἰ θέμις εἰπεῖν,

ψεύσομαι, ὡς Διόνυσος, ἐμὸν γένος· οὐκ ἀπὸ Κάδμου

 170αἷμα φέρω χθονίοιο, πατὴρ δ' ἐμὸς ὄρχαμος ἄστρων,

Ἠέλιός με φύτευσε, καὶ οὐκ ἔσπειρεν Ἐχίων·

τίκτε Σεληναίη με, καὶ οὐκ ἐλόχευσεν Ἀγαύη·

εἰμὶ γένος Κρονίδαο, καὶ αἰθέρος εἰμὶ πολίτης·

οὐρανὸς ἀστερόφοιτος ἐμὴ πόλις· ἵλατε, Θῆβαι·

 175Παλλὰς ἐμὴ παράκοιτις, ἐμὴ δάμαρ ἄμβροτος Ἥβη·

Πενθέι μαζὸν ὄρεξε μετ' Ἄρεα δεσπότις Ἥρη,

καὶ ζαθέη μετὰ Φοῖβον ἐγείνατο Πενθέα Λητώ·

Ἄρτεμιν ἱεμένην νυμφεύσομαι· οὐδέ με φεύγει,

ὥς ποτε Φοῖβον ἔφευγεν ἑῆς μνηστῆρα κορείης,

 180μῶμον ἀλυσκάζουσα κασιγνήτων ὑμεναίων.

εἰ δὲ τεὴν Σεμέλην οὐκ ἔφλεγεν οὐρανίη φλόξ,

παιδὸς ἑῆς διὰ μῶμον ἑὸν δόμον ἔφλεγε Κάδμος,

ἀστεροπὴν δ' ἐκάλεσσε χαμαιγενὲς ἁπτόμενον πῦρ,

καὶ δαΐδων ὀνόμηνε σέλας σπινθῆρα κεραυνοῦ.

 185- ὣς φαμένου βασιλῆος ἐπεστρατόωντο μαχηταὶ

ὁπλοφόροι κενεοῖσιν ἐριδμαίνοντες ἀήταις·

καὶ στρατὸς ἄσπετος ἦεν ἔσω πιτυώδεος ὕλης,

ἴχνια μαστεύοντες ἀθηήτοιο Λυαίου.

- ὄφρα μὲν ἐνναέτῃσιν ἄναξ ἐπετέλλετο Πενθεύς,

 190τόφρα δὲ καὶ Διόνυσος ἀφεγγέα νύκτα δοκεύων

τοῖον ἔπος πρὸς Ὄλυμπον ἀνίαχε κυκλάδι Μήνῃ·

- ὦ τέκος Ἠελίοιο, πολύστροφε, παντρόφε Μήνη,

ἅρματος ἀργυφέοιο κυβερνήτειρα Σελήνη,

εἰ σὺ πέλεις Ἑκάτη πολυώνυμος, ἐννυχίη δὲ

 195πυρσοφόρῳ παλάμῃ δονέεις θιασώδεα πεύκην,

ἔρχεο, νυκτιπόλος, σκυλακοτρόφος, ὅττι σε τέρπει

κνυζηθμῷ γοόωντι κυνοσσόος ἔννυχος ἠχώ·

Ἄρτεμις εἰ σὺ πέλεις ἐλαφηβόλος, ἐν δὲ κολώναις

νεβροφόνῳ σπεύδουσα συναγρώσσεις Διονύσῳ,

 200ἔσσο κασιγνήτοιο βοηθόος· ἀρχεγόνου γὰρ

αἷμα λαχὼν Κάδμοιο διώκομαι ἔκτοθι Θήβης,

μητρὸς ἐμῆς Σεμέλης ἀπὸ πατρίδος· ὠκύμορος γὰρ

θνητὸς ἀνὴρ κλονέει με θεημάχος· ὡς νυχίη δὲ

νυκτελίῳ χραίσμησον ἐλαυνομένῳ Διονύσῳ·

 205εἰ δὲ σὺ Περσεφόνεια νεκυσσόος, ὑμέτεραι δὲ

ψυχαὶ Ταρταρίοισιν ὑποδρήσσουσι θοώκοις,

νεκρὸν ἴδω Πενθῆα, καὶ ἀχνυμένου Διονύσου

δάκρυον εὐνήσειε τεὸς ψυχοστόλος Ἑρμῆς·

σεῖο δὲ Τισιφόνης μανιώδεος ἠὲ Μεγαίρης

 210Ταρταρίῃ μάστιγι λαθίφρονα παῦσον ἀπειλὴν

Γηγενέος Πενθῆος, ἐπεὶ δυσμήχανος Ἥρη

ὀψίγονον Τιτῆνα νέῳ θώρηξε Λυαίῳ.

ἀλλὰ σὺ φῶτα δάμασσον ἀθέσμιον, ὄφρα γεραίρῃς

ἀρχεγόνου Ζαγρῆος ἐπωνυμίην Διονύσου.

 215Ζεῦ ἄνα, καὶ σὺ δόκευε μεμηνότος ἀνδρὸς ἀπειλήν·

κλῦθι, πάτερ καὶ μῆτερ· ἐλεγχομένου δὲ Λυαίου

σὴ στεροπὴ γαμίη Σεμέλης τιμήορος ἔστω.

- ὣς φαμένου ταυρῶπις ἀνίαχεν ὑψόθι Μήνη·

- νυκτιφαὲς Διόνυσε, φυτηκόμε, σύνδρομε Μήνης,

 220σῆς σταφυλῆς ἀλέγιζε· μέλει δέ μοι ὄργια Βάκχου,

ὑμετέρων ὅτι γαῖα φυτῶν ὠδῖνα πεπαίνει

μαρμαρυγὴν δροσόεσσαν ἀκοιμήτοιο Σελήνης

δεχνυμένη· σὺ δέ, Βάκχε χοροίτυπε, θύρσα τιταίνων

σῆς γενετῆς ἀλέγιζε, καὶ οὐ τρομέεις γένος ἀνδρῶν

 225ἀδρανέων, οἷς κοῦφος ἀεὶ νόος, ὧν καὶ ἀνάγκῃ

Εὐμενίδων μάστιγες ἀναστέλλουσιν ἀπειλάς.

σὺν σοὶ δυσμενέεσσι κορύσσομαι· ἶσα δὲ Βάκχῳ

κοιρανέω μανίης ἑτερόφρονος· εἰμὶ δὲ Μήνη

Βακχιάς, οὐχ ὅτι μοῦνον ἐν αἰθέρι μῆνας ἑλίσσω,

 230ἀλλ' ὅτι καὶ μανίης μεδέω καὶ λύσσαν ἐγείρω.

οὐ χθονίην σέθεν ὕβριν ἐγὼ νήποινον ἐάσσω·

ἤδη γὰρ Λυκόοργος ἀπειλήσας Διονύσῳ,

ὁ πρὶν ἐὼν ταχύγουνος, ὁ Μαινάδας ὀξὺ διώξας,

τυφλὸς ἀλητεύει καὶ δεύεται ἡγεμονῆος.

 235ἤδη δ' ἀμφὶ τένοντας Ἐρυθραίων δονακήων

κέκλιται ἔνθα καὶ ἔνθα, τεῆς αὐτάγγελος ἀλκῆς,

Ἰνδῶν νεκρὸς ὅμιλος, ἀναινομένῳ δὲ ῥεέθρῳ

ἄφρονα Δηριαδῆα πατὴρ ἔκρυψεν Ὑδάσπης

ἔγχεϊ κισσήεντι τετυμμένον· αὐτὰρ ὁ φεύγων

 240πατρῴῳ βαρύθοντι κατηφέι πῖπτε ῥεέθρῳ·

Τυρσηνοὶ δεδάασι τεὸν σθένος, ὁππότε νηῶν

ὄρθιος ἱστὸς ἄμειπτο καὶ ἀμπελόεις πέλεν ὄρπηξ

αὐτοτελής, τὸ δὲ λαῖφος ὑπὸ σκιεροῖσι πετήλοις

ἡμερίδων εὔβοτρυς ἀνηέξητο καλύπτρη,

 245καὶ πρότονοι σύριζον ἐχιδνήεντι κορύμβῳ

ἰοβόλοι, βροτέην δὲ φυὴν καὶ ἐχέφρονα βουλὴν

δυσμενέες ῥίψαντες ἀμειβομένοιο προσώπου

ἀφραδέες δελφῖνες ἐνιπλώουσι θαλάσσῃ·

εἰσέτι κωμάζουσι καὶ ἐν ῥοθίοις Διονύσῳ,

 250οἷα κυβιστητῆρες ἐπισκαίρουσι γαλήνῃ.

καὶ νέκυς ὑμετέρῳ βεβολημένος ὀξέι θύρσῳ

χεύμασιν Ἀσσυρίοισι καλύπτεται Ἰνδὸς Ὀρόντης,

εἰσέτι δειμαίνων καὶ ἐν ὕδασιν οὔνομα Βάκχου.

- τοῖον ἔπος Βρομίῳ χρυσήνιος ἴαχε δαίμων.

 255- ὄφρα μὲν εἰσέτι Βάκχος ὁμίλεε κυκλάδι Μήνῃ,

τόφρα δὲ καὶ Ζαγρῆι χαριζομένη Διονύσῳ

Περσεφόνη θώρηξεν Ἐρινύας, ἀχνυμένῳ δὲ

ὀψιγόνῳ χραίσμησε κασιγνήτῳ Διονύσῳ.

αἱ δὲ Διὸς χθονίοιο δυσάντεϊ νεύματι νύμφης

 260Εὐμενίδες Πενθῆος ἐπεστρατόωντο μελάθρῳ,

ὧν ἡ μὲν ζοφεροῖο διαθρῴσκουσα βερέθρου

Ταρταρίην ἐλέλιζεν ἐχιδνήεσσαν ἱμάσθλην,

Κωκυτοῦ δὲ ῥέεθρον ἀρύετο καὶ Στυγὸς ὕδωρ,

καὶ χθονίῃ ῥαθάμιγγι δόμους ἔρραινεν Ἀγαύης,

 265οἷα προθεσπίζουσα γόον καὶ δάκρυα Θήβης·

Ἀκταίην δὲ μάχαιραν ἀπ' Ἀτθίδος ἤγαγε δαίμων,

ἀρχαίην Ἰτύλοιο μιαιφόνον, ᾗ ποτε μήτηρ

Πρόκνη θυμολέαινα σὺν ἀνδροφόνῳ Φιλομήλῃ

τηλυγέτην ὠδῖνα διατμήξασα σιδήρῳ

 270παιδοβόρῳ Τηρῆι φίλην δαιτρεύσατο φορβήν·

κείνην χειρὶ φέρουσα φόνων ὀχετηγὸν Ἐρινὺς

ἀρχεκάκοις ὀνύχεσσι διαγλύψασα κονίην

Ἀττικὸν ἔκρυφεν ἆορ ὀρεσσιφύτῳ παρὰ ῥίζῃ

μηκεδανῆς ἐλάτης, †η Μαινάδες, ὁππόθι Πενθεὺς

 275μέλλε θανεῖν ἀκάρηνος· ἐπαμήσασα δὲ κόχλῳ

Γοργόνος ἀρτιφόνοιο νεόρρυτον αἷμα Μεδούσης

πορφυρέαις ἔχρισε Λιβυστίσι δένδρον ἐέρσαις.

καὶ τὰ μὲν ἐν σκοπέλοις τεχνήσατο μαινὰς Ἐρινύς.

- ὀρφναίοις δὲ πόδεσσι δόμων ἐπεβήσατο Κάδμου

 280νυκτιφαὴς Διόνυσος ἔχων ταυρώπιδα μορφήν,

αἰθύσσων Κρονίην μανιώδεα Πανὸς ἱμάσθλην·

βακχεύσας δ' ἀχάλινον Ἀρισταίοιο γυναῖκα

Αὐτονόην ἐκάλεσσε, καὶ ἴαχε θυιάδι φωνῇ·

- ὀλβίη Αὐτονόη Σεμέλης πλέον· ἀρτιγάμου γὰρ

 285υἱέος εἰς ὑμέναιον ἐριδμαίνεις καὶ Ὀλύμπῳ·

αἰθέρος ἥρπασας εὖχος, ἐπεὶ λάχεν ἁβρὸν ἀκοίτην

Ἄρτεμις Ἀκταίωνα καὶ Ἐνδυμίωνα Σελήνη.

οὐ θάνεν Ἀκταίων, οὐκ ἔλλαχε θηρὸς ὀπωπήν,

οὐ στικτῆς ἐλάφοιο τανυγλώχινα κεραίην,

 290οὐ νόθον εἶδος ἔδεκτο, καὶ οὐκ ἐψεύσατο μορφήν,

οὐ κύνας ἀγρευτῆρας ἑοὺς ἐνόησε φονῆας·

ἀλλὰ κακογλώσσων στομάτων κενεόφρονι μύθῳ

υἱέος ὑμετέροιο μόρον ψεύσαντο βοτῆρες,

νυμφίον ἐχθαίροντες ἀνυμφεύτοιο θεαίνης.

 295οἶδα, πόθεν δόλος οὗτος· ἐπ' ἀλλοτρίοις ὑμεναίοις

εἰς γάμον, εἰς Παφίην ζηλήμονές εἰσι γυναῖκες.

ἀλλὰ θυελλήεντι διαθρῴσκουσα πεδίλῳ

σπεῦδε μολεῖν ἀκίχητος ἐς οὔρεα· κεῖθι μολοῦσα

ὄψεαι Ἀκταίωνα συναγρώσσοντα Λυαίῳ,

 300Ἄρτεμιν ἐγγὺς ἔχοντα, καὶ αἰόλα δίκτυα θήρης ...

ἐνδρομίδας φορέοντα, καὶ ἀμφαφόωντα φαρέτρην.

ὀλβίη Αὐτονόη Σεμέλης πλέον, ὅττι θεαίνης

εἰς γάμον ἐρχομένης ἑκυρὴ πέλες Ἰοχεαίρης·

Ἰνοῦς καλλιτόκοιο μακαρτέρη, ὅττι θεαίνης

 305σὸς πάις ἔλλαχε λέκτρα, τὰ μὴ λάχεν Ὦτος ἀγήνωρ.

οὐ θρασὺς Ὠρίων πέλε νυμφίος Ἰοχεαίρης.

χάρματι δ' ἡβήσας σέθεν υἱέος εἵνεκα νύμφης

κωμάζει σέο Κάδμος ὀρεσσαύλῳ παρὰ παστῷ,

σείων ἠερίοις ἀνέμοις χιονώδεα χαίτην.

 310ἔγρεο, καὶ σὺ γένοιο γαμοστόλος, εὔλοχε μήτηρ·

ἅρμενος οὗτος ἔρως, ὅτι νυμφίον Ἄρτεμις ἁγνὴ

υἷα κασιγνήτοιο καὶ οὐ ξένον ἔσχεν ἀκοίτην.

ἀλλὰ θεὰ φυγόδεμνος ἐπήν ποτε παῖδα λοχεύσῃ,

υἱέα κουφίζουσα σαόφρονος Ἰοχεαίρης

 315πήχεϊ παιδοκόμῳ ζηλήμονι δεῖξον Ἀγαύῃ.

τίς νέμεσίς ποτε τοῦτο, κυνοσσόος εἰ παρὰ παστῷ

ἤθελε θηρητῆρα λαγωβόλον υἷα λοχεῦσαι,

εἴκελον Ἀκταίωνι φιλοσκοπέλῳ τε Κυρήνῃ,

μητρῴων ἐλάφων ἐποχημένον ὠκέι δίφρῳ;